კულტურის კვლევების სადოქტორო პროგრამა ითვალისწინებს, პირველ რიგში, თეორიული და მეთოდოლოგიური აპარატის სრულყოფას და მის ემპირიულ/საკვლევ მასალასთან შესაბამისობაში მოყვანას. განსაკუთრებული ყურადღება დაეთმობა კულტურის მეცნიერების წიაღში გაჩენილი კვლევით პერსპექტივების (იკონოლოგია, ვიზუალური ანთროპოლოგია, კულტურული მეხსიერება, პერფორმატიულობა, კულტურული სემანტიკა, მიკროისტორია და სხვა) მეთოდოლოგიისა და პრობლემატიკის შესწავლა-დამუშავებას. პროგრამის ფარგლებში საგანგებო აქცენტი გაკეთდება ქართულ და კავკასიურ თემატიკაზეც, მათ შესწავლასა და გააზრებაზე, როგორც თანამედროვე გლობალურ, ასევე პოსტკოლონიურ, პოსტსოციალისტურ და პოსტიმპერიულ კონტექსტებშიც.